You are not enough

أحنا بقينا أساتذة ف حاجات كتير أوي, في اللبس, في الذقن لو شباب, في الmake-up  لو بنات, في السواقة في أننا نتعلم حاجات جديدة, و مانتعلمش, بقينا أساتذة في الكسل, غير بقي الهري والخبث والتحوير وكل الكلام الجميل ده
بس فوق كل ده أحنا بقينا عباقرة ف concept "Not Enough"  "مش كفاية"

أنت مش كفاية, أنا مش كفاية, كل حاجة بتحصل حوالينا مابقتش ماليه عيننا

بقينا نعرف ازاي نروج المبدأ دا ونبيعه لنفسنا قبل الناس

حضرتك بتصحي الصبح, اول ما بتبص في مراية الحمام بتبص لنفسك بصة أرف وتبدأ تقتنع أنك مش كفايه:  "ياه لو كنت أطول", "دانا لو كنت أرفع كنت عملت..", "لو سناني بس كانت كويسة مش بتبوظلي الصور!" , "لو شعري أتقل" وغيره كتير أوي

تطلع تلاقي مامتك محضرالك الفطار زي الباشا, فا تبص للفطار بصة ال"مش كفاية" وليه مفيش كرواسون بالنوتيلا! او وافل بالتوت البري, انشالله كورن فليكس بس مش اللي قدامي, وتبدأ تبيع لمامتك نفس المبدأ وتقولها أصله ناقص ملح, والست ياعيني تحس أنها مقصرة في حقك, وتحس أنها مقدمة علف لبغل ومفيش كلمة شكر ولا تقدير لوقفتها

بعدها سعادتك تنزل تاخد عربيتك ولا المواصلات وفي الحالتين مش مبسوط ومكمل بنفس المبدأ

لو أوتوبيس فا الكمسري مقصر في شغله وقاعد بيرغي والسواق مش بيعرف يسوق, ولة في عربيتك فا الستات كلها مابتعرفش تسوق وعسكري المرور واقف مش مركز أنك متأخر وأنه محتاج يفتح الأشارة

مش محتاجة أتكلم علي فقرة الشغل أو الدراسة وبترجع البيت واليوم مكمل علي كده بنفس البؤس دا! 

وبعدين نستغرب ان احنا كارهين نفسنا وكارهين عيشتنا

أحنا مصدقين أوي ان احنا مش كفاية وعمالين ندور علي اي هوامش تدينا احساس بالقيمة

مابقيناش نسمع نقد الناس من كتر ماحنا قرفانين من نفسنا وبنهرب منها

أنا مش هدي حل! عشان أنت عارف المفروض تشتغل علي ايه

في جملة بتقول "Don't complain about things you're not willing to change"

أقبل نفسك والناس بكل حاجة وحشة

ولما تكون مش عجباك حاجة فيك بعد كدا هاتعرف تغيرها ازاي

#خواطر_مواعين